Madamu Jeannette Kagame (hagati) asobanura ingamba ku rukingo rwa SIDA

Mu nama  ya 59 y’umuryango w’Abibumbye wita k’ubuzima ibera mu Rwanda, ibihugu by’Afurika birishimira  ubwitange  bwa Madamu Jeannette Kagame mu gushakisha urukingo rwa  Sida, bikaba  byiyemeza  gushyiraho  uruhare  rwabyo.Nkuko bisobanurwa  na Madamu Jeannette Kagame, urukingo rwa SIDA nirwo ruzatuma  igabanuka. Kuri  iyi  ngingo asobanura ko ku bantu miliyoni 9,7 bakeneye imiti igabanya ubukana bwa Sida, miliyoni 3 aribo bonyine bashobora kuyibona. Abana barenga ibihumbi magana atatu bavukana sida buri mwaka, kugeza ubu hakaba habarurwa miliyoni 11,6 z’imfubyi za Sida,harimo miliyoni 6 z’Abanyafurika,  naho buri munsi hakaba hapfa abantu 7,500 bishwe na Sida.Kubera  ubukomere bw’ikibazo cya  SIDA, ahagana mu mwaka w’2000 hatangijwe  porogaramu yo gushakisha urukingo rwa SIDA (African Aids vaccination Programme ), Madame Jeannette Kagame akaba ayibere intumwa ku rwego rw’Afurika.
Ibihugu byitabiriye  inama ya 59 ibera i Kigali bikaba bishyigikiye ko iyo porogaramu yakwihuta ikagera mu bihugu byose bigize umugabane kuko Afurika ariyo ibangamiwe cyane na Sida kandi  ibisubizo bikaba bigomba gutangwa n’Abanyafurika ubwabo.

Inzitizi zizakurwaho urukingo ruboneke vuba

Zimwe mu nzitizi zituma urukingo rutaboneka vuba ni uko abashakashatsi b’abahanga bakomoka muri Afurika bigira hanze, bagakoresha ubwenge bwabo ahandi. Muri iyi nama byasbwe ko ibihugu bigiye kwitabaza abanyabwenge bifite, bikanatanga ibikenewe byose mu kwihutisha ubushakashatsi. Kuri iyi ngingo, umuyobozi w’umuryango w’Abibumbye wita k’ubuzima ku isi, Dr Margaret Chan yavuze ko umuryango ayoboye nawo uzashyiraho akawo. Ibihugu byinshi byatangiye gukora ubushakashatsi k’urukingo rwa Sida, nko muri Uganda, hashize imyaka 9 ubushakashatsi  buriho.
Mu nama zitandukanye harimo iyahuje abafasha b’Abaperezida,  urukingo rwa SIDA rwagarutsweho kenshi, haba mu 2001 no  mu mwaka wa 2005-2006 ari nabwo Madamu Jeannette Kagame yagizwe  umuvugizi ku ishyirwaho ry’urukingo rwa Sida ku rwego rw’Afurika. N’ubwo hari  byinshi byishimirwa ko byagezweho muri Afurika nko kongerera umugore utwite amahirwe yo kubyara umwana muzima, gutanga imiti ku babana n’ubwandu, gushishikariza abagabo kwicyebesha kuko bigabanya kwandura no kwanduza abo bakorana imibonano mpuzabitsina;  ngo ntibihagije kuko ikigamijwe ari uko Afurika yashiramo Sida burundu.  Iyi ngamba ngo izagerwaho abayobozi b’Afurika nibagira gahunda nziza mu miyoborere yabo, ubushobozi buteza imbere ubushakashatsi bukongerwa.
Byitezwe ko urukingo niruboneka ruzarengera abantu benshi cyane cyane urubyiruko, bityo abazavuka nyuma yuko rutangiye bakazabaho mu buzima buzira Sida. Ibi  bikaba bishoboka urebye ubushake no gushyira hamwe  ibihugu by’Afurika bigaragaraza mu nama ibera Kigali. Mu Rwanda bakaba nabo bageze kure ubushakashatsi bureba n’urukingo rwa Sida, binyuze mu kigo cyitwa San Francisco. Kuri uyu mbere ushize, tariki ya 31 kanama, Madamu Jeannette Kagame akaba yarasuye icyo kigo yirebera aho ubwo bushakashatsi  bugeze.

Kapiteni  Alexis

http://www.orinfor.gov.rw/imvaho1918d.htm

Poste par rwandaises.com