Mu gihe Victoire Ingabire ategereje isomwa ry’urubanza rwe aregwamo ibyaha birimo icyo kurema umutwe w’ingabo ugamije kubuza umudendezo w’igihugu, icyo gukwirakwiza ibihuha bigamije kwangisha ubutegetsi abaturage n’icyo kurema umutwe w’ingabo hagamije gutera igihugu, ishyaka yahoze abereye umuyobozi kuri ubu riravugwamo umwuka mubi aho ryacitsemo ibice bibiri bihanganye mu ntambara y’amagambo akarishye bamwe bita abandi ‘abagambanyi’, abandi babita ‘inkundarubyino/rupigapiga’.
Aba bagenzi b’uwahoze ayoboye FDU-Inkingi, Victoire Ingabire, kugeza ubu bananiwe gucyemura ubwumvikane bucye buri hagati yabo, kuburyo bigeze aho bacikamo ibice bibiri birimo birashinjanya ubugambanyi.
Mu gihe umuyobozi wabo biteganyijwe ko azasomerwa vuba aha, itsinda rimwe ry’abagize FDU-Inkingi ryamaze guhitamo umuyobozi mushya, Eugene Ndahayo, kuri ubu uri kubarizwa mu Bufaransa. Iri tsinda ribinyujije mu itangazo rigenewe abanyamakuru ryatangaje ko iki cyemezo ryafashe cyatewe n’uko bishoboka ko Ingabire Victoire yahita akatirwa igifungo.
Mu ibaruwa Ndahayo aheruka kwandika, hari aho agaragaraza ko uruhande bahanganye rugizwe n’inkundarubyino. Kutumva ibintu kimwe kwaje kuvamo gushwana burundu kugeza n’aho impande zombi zakomeje kujya zikoresha amagambo akarishye, usibye bamwe kwita abandi ‘inkundarubyino/rupigapiga’, byageze n’aho bamwe bita abandi ko ari abana muri politiki.
Ndahayo kandi muri iyo baruwa yanditse, yagaragaje ko atemeranya n’amasezerano y’ubufatanye yasinywe hagati ya FDU-Inkingi na Rwanda National Congress igizwe na Kayumba Nyamwasa, Gerald Gahima na Theogene Rudasingwa, avuga ko ubwo bufatanye buhabanye n’amahame remezo ya FDU-Inkingi ngo kuko bamwe mu bagize RNC bagiye bakora ibikorwa bidahwitse.
Igice cya kabiri cyemeza ko icya Ndahayo cyigumuye ku ishyaka gikoresheje uburyo bwa kudeta (coup d’etat), kikaba kiyobowe na Twagirimana Boniface uba mu Rwanda. Iki gice gihagarariwe na Nkiko Nsengimana uba mu Busuwisi. Mu itangazo aheruka gushyira ahagaragara, Twagirimana yamaganye ibikorwa bya Ndahayo n’igice ayoboye avuga ko “bigamije kwigizayo perezida w’ishyaka mbere y’uko urubanza rwe rusomwa.”
Kubwa Twagirimana, kuba igice cya Ndahayo cyarihutiye gushyiraho perezida mushya w’ishyaka ngo bigaragaza ko ari abagambanyi, akaba yibaza impamvu batategereje ko urubanza rwa Ingabire Victoire rusomwa bityo hagafatwa imyanzuro ya nyuma.
Biteganyijwe ko urubanza rwa Ingabire ruzasomwa kuwa Gatanu tariki 29 Kamena uyu mwaka.
www.igihe.com/amakuru/mu-rwanda/bombori-bombori-muri-fdu-inkingi.html
Posté par rwandaises.com
