Eugene Mugabo
KICUKIRO – Ku wa 10 Werurwe 2011, muri Alpha Palace Hotel, Urwego rw’Umuvunyi rwahuye n’abayobozi b’amadini n’ amatorero basabwa gucunga neza imitungo y’iyo miryango kuko ari iy’Abanyarwanda .
Ibyo byatangajwe n’Umuvunyi Mukuru Tito Rutaremara mu nama y’umunsi umwe yagiranye n’abayobozi b’amadini atandukanye akorera mu Rwanda.
Nk’uko bivugwa n’Umuvunyi Mukuru Tito Rutaremara, ruswa n’ibindi byaha bifitanye isano nabyo ngo bishobora kuboneka no mu bayobozi b’amadini kuko nabo ari abantu nk’abandi, akaba ariyo mpamvu abanyamadini nabo bakeneye kurushaho gusobanukirwa ibijyanye n’ibyo byaha bagafatanya n’izindi nzego kubirwanya.
Umuvunyi Mukuru Tito Ruraremara yatangarije ikinyamakuru Izuba Rirashe ko mu madini hari ibimenyetso by’uko naho hashobora kuboneka kutubahiriza amategeko cyane cyane mu micungire y’umutungo.Tito Rutaremara yatangaje ko urwego ayoboye rugiye kujya rukurikirana imicungire y’umutungo mu madini atandukanye.
Umwe mu bashumba b’amatorero bari aho Ephrem Nyilinkindi yatangarije Izuba Rirashe ko mu matorero amwe n’amwe koko hagaragara imicungire mibi y’umutungo.
Intego nkuru y’ayo mahugurwa y’umunsi umwe yari ugufasha abayobozi b’amadini kurushaho kumenya ruswa n’uburyo bwo kuyirwanya kuko bahura n’Abanyarwanda bibumbiye mu madini atandukanye bashobora gufashwa n’inyigisho bahabwa. Bazafasha kandi kurwanya ruswa n’ibindi byaha bisa nayo binyuze mu matsinda y’urubyiruko yo kurwanya ruswa.
Uretse kurwanya ruswa n’akarengane, Urwego rw’Umuvunyi ruranahamagarira abo bayobozi kwitabira imiyoborere myiza baha urubuga abayoboke babo ntibiharire ijambo.
Zimwe mu ngingo abo bayobozi b’amadini bahuguwemo ni imiterere n’imikorere y’Urwego rw’Umuvunyi, uruhare rw’imiyoborere y’amadini mu kurwanya ruswa n’akarengane.
http://www.izuba.org.rw/index.php?issue=523&article=21123
Posté par rwandaises.com
