Minisiteri y’Ubuzima yatangaje ko undi muntu yishwe na COVID-19, bituma umubare w’abamaze guhitanwa n’iki cyorezo ku butaka bw’u Rwanda ugera kuri 16.
Itangazo rya Minisante rivuga ko uwitabye Imana kuri uyu wa Gatanu, ari umubyeyi w’imyaka 81.
Kuri uyu wa 28 Kanama 2020 kandi abantu 70 nibo basanzwemo ubwandu bwa COVID-19 iterwa na Coronavirus mu bipimo 5159 byafashwe, bituma umubare w’abamaze kwandura uba 3742 mu gihe batatu bakize, abamaze gusezererwa mu bitaro baba 1866.
Abarwayi bashya bagaragaye mu Mujyi wa Kigali ahakuwe 54 mu bapimwe mu masoko, i Rusizi ni barindwi, Nyamasheke ni batatu, Rubavu ni batatu, i Kirehe ni babiri mu gihe i Musanze habonetse umwe.
Kuri ubu mu bitaro bivurirwamo abarwayi ba Coronavirus harimo 1860 bari kwitabwaho n’abaganga umunsi ku wundi.
Minisante yagaragaje ko ‘‘Ijanisha ku bapfa rihagaze kuri 0.4%, mu gihe iry’abandura ari 1.4%.’’
Minisitiri w’Ubuzima, Dr Daniel Ngamije, aheruka gutanga ko mu gihe hatafatwa ingamba mu minsi 30 iri imbere, u Rwanda rushobora gupfusha abantu nka 25.
Yagize ati ‘‘Dufite abarwayi barindwi bari mu nzu z’indembe barimo n’ufite imyaka 22.’’
Coronavirus yagaragaye bwa mbere mu Mujyi wa Wuhan mu Bushinwa mu Ukuboza 2019; kuri ubu 24 858 478 bamaze kuyandura ku Isi yose, barimo 839 702 yahitanye mu gihe 17 224 457 bamaze kuyikira.
Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.
Mu gukomeza kwirinda ikwirakwira rya Coronavirus, abaturarwanda basabwa gukomeza kwitwararika no kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, kwirinda imihuro itari ngombwa no kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.
Yanditswe na Kuya 28 Kanama 2020
