Kuri uyu mugoroba ruraba rwambikanye i Santiago Bernabeu aho ikipe ya Real Madrid iba yakiriye Lyon mu mukino wa 1/8 wo kwishyura mu gikombe cy’amakipe yabaye ayambere ku mugabane w’i Burayi. Ikipe ya Real Madrid igomba kwishyura igitego yatsindiwe i Gerland mbere yo kugira ibindi ikora niba ishaka kurenga 1/8 ikagera muri 1/4.
Ibi bikaba bibonwa na benshi ko bishoboka mu gihe burya mu kibuka ababurana ari babiri umwe aba yigiza nkana. Benshi mu bakinnyi ba Real Madrid batangaje ko baza gukora ibishoboka byose maze intsinzi igataha i Santiago Bernabeu arinaho hazabera umukino wanyuma bose bakaba bari kwifuza kuzawukinira ku kibuga cyabo.
Kuwukina bagomba kubanza gusezerera Lyon mbere yo kugira ikindi bereka abakunzi babo badahwema kubaba inyuma mu bihe bibi baba barimo , aho bikaba byaragaragarariye muri weekend ishize aho sevilla itari yabatsindiye iwabo Santiago Bernabeu ibitego bibiri ku busa bakaza gutahana intsinzi .
Iyo urebye neza usanga Real Madrid yaratsindiwe gake gashoboka ku kibuga cyayo uyu mwaka, aho akaba ari rimwe gusa na Ac Milan , iyo witegereje mu mikino 14 yahakiniye muri La Liga yatsinze ibitego 44 , Ronaldo atsindamo 11. Ibi bikagaragaza uruhare uyu musore uhenze kurusha abandi impamvu zayo. Twabibutsa ko yaguzwe akayabo ka miliyoni 94 z’ama Euro.
Uyu mukino utegerejwe na benshi mu bakunzi ba ruhago aho bashaka kureba niba akayabo k’ama Euro miliyoni amagana yatanzwe na Real Madrid mu igurwa ry’abakinnyi. Iyo witegereje ukanumva ibitangazwa na benshi mu bakinnyi bagerageje guhangana na Real Madrid uyu mwaka i Santiago Bernabeu bose ntayindi ntero ni Cristiano Ronaldo wabazonze , aho batangaza ko uyu mugoroba aba yazonze ikipe ya Lyon.
Uyu rutahizamu wa Real Madrid ukunzwe cyane n’abafana bayo yazonze benshi, aho bakubwira amashoti n’amacenga abatera ko bibarenga, ikindi gitangazwa n’umwe muri ba myugariro ba Marseille, agira ati « niba ushaka gutsinda Real Madrid, vuna ku munota wa mbere Ronaldo, naho ubundi numureka agakina umenye ko kakubayeho ».
Ikipe ya Lyon nayo ubwayo yiteze umukino utoroshye na gato nkuko benshi mu bakinnyi bayo babivuga, batangaza ko babona biri kure kuza guhangamura ikipe nka Real Madrid iwayo , nyamara byose birashoboka muri ruhago.
Uyu mukino wavuzweho amagambo menshi cyane ku mpande zombi. Dore bimwe mu byatangajwe:
Ronaldo : Uyu mukino urakomeye ni uwo gupfa no gukira, sinzi niba ikipe ya Lyon yaranditse amateka ku mugabane w’ i Burayi!
Guti: Tugiye gutsinda Lyon ibitego 3-0 , bafana bacu nimuze mwirebere maze munezerwe.
Ramos: Xabi Alonso ni umukinnyi ukomeye kuruhande rwacu, kuba atari bube ari mu kibuga birababaje cyane.
Casillas: Njye ndabona turi butsinde 2-0.
Si Ronaldo gusa utegerejweho byinshi kuko Kaka , Higuain nabo bataba baje kuba indorerezi mu kibuga , ibi bikaba bitari bworohere na gato iyi kipe ya Lyon. Ikipe ya Lyon nayo ishobora gutungurana igasubiza ikipe ya Real Madrid mu icuraburindi imaze imyaka 4 aho yananiwe kurenga 1/8 imyaka 5 yose ishize.
Joe
http://www.igihe.com/news-4-10-3459.html
Posté par rwandaises.com
