Umuryango uharanira uburenganzira bw’ikiremwamuntu Global Witness watangaje ko watanze ikirego mu Rukiko rukuru rw’u Bwongereza , aho uregamo guverinoma y’u Bwongereza kuba ntacyo ikora ku makompanyi n’abantu bacuruza amabuye y’agaciro aturuka mu turere turangwamo intambara muri Congo, nk’uko biri mu mabwiriza ya Loni. Mu baregwa hakaba harimo amakompanyi yo Bwongereza nyir’izina ndetse n’abantu ku giti cyabo b’Abongereza.

Amwe mu makompanyi ashinjwa ni Thaisarco yo muri Thailande ishamikiye kuri kompanyi y’Abongereza AMC, ndetse na Afrimex; zikaba zishinjwa kuba zikura amabuye y’agaciro muri Congo, ariko ayo mabuye akaba atangwa n’imitwe yitwaje intwaro, harimo na FDLR.

Umuyobozi wa Afrimex, Ketan Kotecha, we aregwa gukorana n’ikompanyi imwe iha imisoro FDLR, mu duce igenzura mu Burasirazuba bwa Congo.

Umuryango Global Witness ukaba usaba guverinoma nshya y’u Bwongereza kutaba nk’abababanjirije, ngo bakaba bagomba gufatira ibihano ayo makompanyi n’abantu bakorana ubucuruzi n’imitwe yitwaje intwaro muri Congo, bagatuma intambara ikomeza gututumba kuko iyo mitwe ibona uburyo bwo kubaho neza no kugura intwaro.

Hagati aho ikompanyi ya AMC yo yahakanye ibyo birego, ikaba yatangaje ko kuva tariki ya mbere Nyakanga uyu mwaka yatangiye gukurikiza amabwiriza avuga ko mbere yo kugura amabuye y’agaciro, hazajya habanza kurebwa aho aturutse. Amabuye avugwa ahanini ni zahabu, gasegereti na coltan.

Kayonga J

http://www.igihe.com/news-7-11-6221.html
Posté par rwandaises.com