U Bufaransa: Abanyamuryango ba RPF Inkotanyi batuye mu Burayi batangiye umwiherero w’iminsi ibiri (Amafoto)

Abanyamuryango ba FPR Inkotanyi baturutse mu bihugu bitandukanye by’u Burayi guhera kuri uyu wa Gatandatu bateraniye mu Bufaransa mu Mujyi wa Lille, aho bari mu mwiherero w’iminsi ibiri.

Uyu mwiherero watangiye kuri uyu wa 29 Kamena 2019, witabiriwe n’Abanyamuryango ba FPR Inkotanyi baturutse mu bihugu birimo; Danemark, u Bwongereza, u Bubiligi, u Budage, u Butaliyani n’ibindi.

Umunsi wa mbere w’umwiherero waranzwe n’ibiganiro birimo icyatanzwe na Komiseri wa FPR Inkotanyi, Tito Rutaremara, wari uhagarariye Umunyamabanga Mukuru w’umuryango.

Hari kandi ikiganiro cyatanzwe na Amb. Chistine Nkulikiyinka cyagarutse ku gukunda igihugu, icyo bivuze n’uko byarushaho kwimakazwa mu Banyarwanda aho bari hose.

Abandi batanze ibiganiro barimo Dr Nsengiyumvo Charles, Umunyarwanda uba mu Bufaransa, Habimana Jocelyn na Amb. Jean Pierre Karabaranga watanze ikiganiro kuri Demokarasi mu Rwanda n’isura u Rwanda rufite kubera uko ikorana neza n’abanyarwanda baba mu mahanga (Diaspora).